واقعات تو پیش آتے رہتے ہیں، پی ایس ایل اپنے شیڈول کے مطابق جاری رہے گا ، چیئرمین پی سی بی نجم سیٹھی

کراچی : پاکستان کرکٹ بورڈ( پی سی بی) مینجمنٹ کمیٹی کے چیئرمین نجم سیٹھی نے کہا ہے کہ واقعات پیش آتے رہتے ہیں،پی ایس ایل اپنے شیڈول کے مطابق جاری رہے گا، تمام میچز اپنے شیڈول کے مطابق ہی کھیلیں جائیں گے،لیگ کو برقرار رکھنا ایک چیلنج ہے، غیر معمولی تعاون پر سندھ حکومت کے شکر گزار ہیں، گراس روٹ پر اقدامات کر کے ویمن لیگ کا بھی انعقاد کرائیں گے۔

ان خیالات کا اظہار انہوں نے سابق ٹیسٹ کرکٹر جلال الدین کی کتاب کی تقریب رونمائی میں خطاب کرتے ہوئے کیا۔ جلال الدین کی کتاب کسٹمز کرکٹ جرنی کی تقریب رونمائی کراچی جمخانہ میں منعقد ہوئی۔نجم سیٹھی نے کہا کہ جب پی سی بی چھوڑ کر گیا تو ساری توجہ ڈومیسٹک کرکٹ پر تھی،وزیراعظم نے مجھے بلا کر کہا کہ پی سی بی کو جوائن کریں، وہاں سب کچھ گڑ بڑہے،میں نے ان سے کہا کہ پہلے ڈیپارٹمنٹ کرکٹ کو بحال کریں گے،اگست تک ڈیپارٹمنٹ کرکٹ بحال کرنی ہے اور اگست، ستمبر تک نیا کرکٹ سیزن شروع ہوجائے گا۔

انہوں نے کہا کہ امید ہے کہ آٹھ سے دس ڈیپارٹمنٹ بحال ہوجائیں گے،کسٹمز ڈیپارٹمنٹ کو بورڈ میں بھی شامل کریں گے،میں نے فیصلہ کیا تھا کہ ویمن کرکٹ کو بحال کرنا ہے اور ویمن لیگ کروانی ہے،جیسے ہی ہم نے ویمن لیگ کا اعلان کیا،بھارت اور آئی پی ایل نے اپنی ویمن لیگ کا اعلان کردیا۔انہوں نے کہا کہ اس سال ہم ویمن لیگ لانچ کرنے جارہے ہیں۔ انہوں نے کہا کہ منیبہ علی نے ویمنز ٹی ٹونٹی ورلڈکپ میں شاندار سنچری بنائی جو ہم سب کیلئے باعث فخر ہے،پی ایس ایل کو پاکستان لانا   اور برقرار رکھنا ایک چیلنج ہے۔ اے پی پی